പാലക്കാട്: സ്പിരിറ്റ് കടത്ത് കേസില് അഞ്ചുദിവസമായി ഒളിവിലായിരുന്ന സിപിഎം നേതാവ് അത്തിമണി അനിലിനെ ചിറ്റൂരില് നിന്നും എക്സൈസ് സംഘം പിടികൂടി. പാലക്കാട് തത്തമംഗലത്തിന് സമീപത്ത് നിന്ന് മെയ് ഒന്നിനാണ് എക്സൈസ് ഇന്റലിജന്സ് സ്ക്വാഡ് 525 ലിറ്റര് സ്പിരിറ്റ് പിടികൂടിയത്.
പാലക്കാട് കേന്ദ്രീകരിച്ച് നടത്തുന്ന വ്യാജ കളള് നിര്മ്മാണ സംഘത്തിലെ പ്രധാന കണ്ണിയാണ് അത്തിമണി അനില്. പിടിയിലായ സഹായി മണിയില് നിന്ന് ലഭിച്ച വിവരത്തിന്റെ അടിസ്ഥാനത്തില് ചിറ്റൂര് റെയ്ഞ്ച് എക്സൈസ് സംഘമാണ് അത്തിമണി അനിലിനെ അറസ്റ്റ് ചെയ്യുന്നത്. ജില്ലയിലെ സിപിഎം നേതാക്കളുമായും ഉന്നത എക്സൈസ് ഉദ്യോഗസ്ഥരുമായും ഇയാള്ക്ക് അടുത്ത ബന്ധമുണ്ട്.
സ്പിരിറ്റ് പിടികൂടിയ ഉടന് തന്നെ, കേസ്സൊഴിവാക്കാനായി നിരവധി സിപിഎം നേതാക്കള് എക്സൈസിനെ തുടര്ച്ചയായി ബന്ധപ്പെട്ടതായും റിപ്പോര്ട്ടുകളുണ്ട്. നേരത്തെ അതിര്ത്തി പ്രദേശത്ത് പിടികൂടിയ 2000 ലിറ്ററിലേറെ സ്പിരിറ്റിലും ഇയാള്ക്ക് പങ്കുണ്ടെന്നാണ് വിവരം. മാസങ്ങളായി എക്സൈസ് ഇന്റലിജന്സ് ഇയാളെ നിരീക്ഷിച്ചുവരികയായിരുന്നെങ്കിലും പിടികൂടാനായിരുന്നില്ല. മീനാക്ഷീപുരത്തുളള തെങ്ങിന്തോപ്പുകളിലേക്കാണ് അത്തിമണി അനില് സ്പിരിറ്റെത്തിക്കാന് ശ്രമിച്ചതെന്നാണ് വിവരം. പലപ്പോഴും എക്സൈസ് ഉദ്യോഗസ്ഥരെ ഇയാള് ഉള്പ്പെടെയുളള സംഘം ഭീഷണിപ്പെടുത്തിയിരുന്നതായും പരാതിയുണ്ട്. സ്പിരിറ്റ് കേസില് പ്രതിചേര്ക്കപ്പെട്ടതോടെ പെരുമാട്ടി ലോക്കല് കമ്മിറ്റി അംഗവും അത്തിമണി ബ്രാഞ്ച് സെക്രട്ടറിയുമായ അനിലിനെ പാര്ട്ടിയുടെ പ്രാഥമിക അംഗത്വത്തില് നിന്ന് പുറത്താക്കി.
