കൊച്ചി: സിപിഎം നേതാവും മുന് ധനമന്ത്രിയുമായ വി. വിശ്വനാഥമേനോന് അന്തരിച്ചു. 1987 ലെ ഇ കെ നയനാര് മന്ത്രിസഭയിലെ ധനമന്ത്രിയായിരുന്ന വിശ്വനാഥ മേനോന് രണ്ടു തവണ പാര്ലമെന്റംഗവും ആയിരുന്നു. വാര്ദ്ധക്യ സഹജമായ അസുഖങ്ങളെ തുടര്ന്ന് കൊച്ചിയിലെ സ്വകാര്യ ആശുപത്രിയില് ചികിത്സയിലായിരുന്നു.
ഇടയ്ക്ക് സിപിഎമ്മുമായി പിണങ്ങിയ അദ്ദേഹം 2003 ല് എറണാകുളത്ത് ഉപതെരഞ്ഞെടുപ്പില് സ്വതന്ത്രസ്ഥാനാര്ത്ഥിയായി പാര്ലമെന്റിലേക്ക് മത്സരിച്ചിരുന്നു. സുഹൃത്തുക്കള്ക്കിടയില് അമ്പാടി വിശ്വം എന്നറിയപ്പെട്ടിരുന്ന വിശ്വനാഥ മേനോന് ഇടപ്പള്ളി പോലീസ് സ്റ്റേഷന് ആക്രമണത്തില് പങ്കുണ്ടെന്ന് ആരോപിക്കപ്പെട്ട കമ്യൂണിസ്റ്റ് നേതാക്കളില് ഒരാളാണ്.
12 വര്ഷം എഫ്.എ.സി.ടി. യൂണിയന് പ്രസിഡന്റും 14 വര്ഷം ഇന്ഡല് യൂണിയന് പ്രസിഡന്റുമായിരുന്നു. കൊച്ചി പോര്ട്ട് യൂണിയന്റെയും പ്രസിഡന്റായിരുന്നു. അവിഭക്ത സി.പി.ഐ.യുടെ പ്രതിനിധിയായും പിന്നീട് സി.പി.ഐ.(എം.) പ്രതിനിധിയായും ഇദ്ദേഹം തിരഞ്ഞെടുക്കപ്പെട്ടിട്ടുണ്ട്.
