തിരുവനന്തപുരം: ശബരിമലയില് ആചാരങ്ങള് സംരക്ഷിക്കണമെന്ന് ആവശ്യപ്പെട്ട് ശബരിമല കര്മസമിതിയുടെ നേതൃത്വത്തില് സംസ്ഥാനത്തെ വിവിധ കേന്ദ്രങ്ങളില് അയ്യപ്പജ്യോതി തെളിയിച്ചു. വനിതാമതിലിന് ബദലായി ശബരിമല കര്മസമിതിയുടെ നേതൃത്വത്തില് നടന്ന അയ്യപ്പജ്യോതിയില് ആയിരക്കണക്കിനു പേര് പങ്കെടുത്തു.
ബിജെപി, ആര്എസ്എസ്, എന്എസ്എസ് എന്നീ സംഘടനകളുടെ പിന്തുണയോടെയായിരുന്നു പരിപാടി നടന്നത്. തിരുവനന്തപുരം മുതല് കാസര്ഗോഡുവരെയാണ് അയ്യപ്പജ്യോതി തെളിയിച്ചത്. ഹൊസങ്കടി ശ്രീധര്മ ശാസ്താക്ഷേത്രത്തില് നിന്നു തുടങ്ങി കളിയിക്കാവിളയില്നിന്നു തമിഴ്നാട്ടിലേക്കു കടക്കുന്ന രീതിയിലായിരുന്നു ക്രമീകരണം.
കളിയിക്കാവിളയില് സുരേഷ് ഗോപി എംപി നേതൃത്വം നല്കി. എംജിഎ രാമന്, കെഎസ് രാധാകൃഷ്ണന്, മാടമ്പ് കുഞ്ഞിക്കുട്ടന് തുടങ്ങിയവരും പങ്കെടുത്തു. നവോത്ഥാന മൂല്യങ്ങള് സംരക്ഷിക്കുക എന്ന ആശയം മുന്നിര്ത്തി സര്ക്കാര് സംഘടിപ്പിക്കുന്ന വനിതാ മതിലിനു ബദലായാണ് വിശ്വാസവും ആചാരവും സംരക്ഷിക്കുക എന്ന മുദ്രാവാക്യമുയര്ത്തി ശബരിമല പ്രക്ഷോഭം നയിക്കുന്ന ശബരിമല കര്മസമിതി അയ്യപ്പജ്യോതി സംഘടിപ്പിച്ചത്.
