കൊച്ചി : ഐഎസആര്ഒ ചാരക്കേസില് മുന് മുഖ്യമന്ത്രി കെ കരുണാകരനെതിരെയുള്ള ഗൂഢാലോചനയ്ക്ക് പിന്നില് അഞ്ച് നേതാക്കളാണെന്ന് കരുണാകരന്റെ മകളും കോണ്ഗ്രസ് നേതാവുമായ പത്മജ വേണുഗോപാല് ആരോപിച്ചു. കേസില് അച്ഛന് നീതി കിട്ടണമെങ്കില് ആ അഞ്ച് പേരുടെ പേരുകള് പറയേണ്ടി വരുമെന്നാണെങ്കില് താനത് ജുഡീഷ്യല് കമ്മിഷനോടു പറയുമെന്നും പത്മജ പറയുന്നു. വിശ്വസിച്ച് കൂടെ നിന്നവര് പോലും അച്ഛനെ കൈവിട്ടുവെന്നും അവര് അച്ഛനെ തള്ളിപ്പറയുകയായിരുന്നുവെന്നും പത്മജ പറഞ്ഞു.
അച്ഛന്റെ നിരപരാധിത്വം തെളിയിക്കേണ്ടതു പാര്ട്ടിയുടെ ഉത്തരവാദിത്തമാണ്. കെ കരുണാകരനെ ചതിച്ച നേതാക്കള് ഇന്നും സുരക്ഷിതരാണ്. അവര്ക്കുള്ള ഇരുട്ടടിയാണ് ഇന്നത്തെ വിധിയെന്ന് പത്മജ പ്രതികരിച്ചു.കേസില് അച്ഛന് നീതി ലഭിക്കുന്നതിന് കൂടെ നിന്ന് ചതിച്ച അഞ്ച് പേരുടെ പേരുകള് വെളിപ്പെടുത്തുന്ന കാര്യത്തില് പാര്ട്ടിയുമായും സഹോദരന് കെ മുരളീധരനുമായും ചര്ച്ച നടത്തുമെന്നും അതിനുശേഷം ഇക്കാര്യത്തില് അന്തിമ തീരുമാനമെടുക്കുമെന്നും പത്മജ വ്യക്തമാക്കി.
