പത്തനാപുരം: പിടവൂര്‍ മുട്ടത്തുകടവ് പാലത്തില്‍നിന്ന് കല്ലടയാറ്റിലേക്ക് ചാടിയ യുവതിയുടെ മൃതദേഹം കണ്ടെത്തി. ശനിയാഴ്ച ഉച്ചയ്ക്ക് 12.15-ന് പിടവൂര്‍ ജങ്ഷനില്‍ ബസിറങ്ങിയ യുവതി സമീപത്തെ ക്ഷേത്രത്തില്‍ തൊഴുതശേഷം പാലത്തെ ലക്ഷ്യമാക്കി പോകുന്ന സി.സി.ടി.വി. ദ്യശ്യം പോലീസ് കണ്ടെടുത്തിരുന്നു. ജങ്ഷനിലെ സ്ഥാപനത്തില്‍നിന്ന് കിട്ടിയ ദ്യശ്യം പരാതിക്കാരെ കാണിച്ച്‌ കാണാതായ യുവതിയാണെന്ന് സ്ഥിരീകരിച്ചതായി പോലീസ് പറഞ്ഞു.
പെണ്‍കുട്ടി ആറ്റില്‍ ചാടിയതായി ദൃക്സാക്ഷികള്‍ പറഞ്ഞസമയവും സി.സി.ടി.വി. ദൃശ്യത്തിലെ സമയവും പൊരുത്തപ്പെടുന്നതായും പോലീസ് അറിയിച്ചിരുന്നു. മഴ വകവയ്ക്കാതെ സേനയുടെ മൂന്നു യൂണിറ്റുകള്‍ ചേര്‍ന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്. പത്തനാപുരം വാഴപ്പാറ സ്വദേശി ലേഖ (21)യുടെ മൃതദേഹമാണ് തിങ്കളാഴ്ച രാവിലെ കണ്ടെത്തിയത്. മകളെ കാണാനില്ലെന്നുകാട്ടി ഇവരുടെ മാതാപിതാക്കള്‍ ഞായറാഴ്ച പത്തനാപുരം പോലീസില്‍ പരാതി നല്‍കിയിരുന്നു.
