ബിഹാര്‍: സ്ത്രീധന പ്രശ്നങ്ങളോ, വധു വരന്മാരുടെ പ്രണയബന്ധങ്ങളോ ഒക്കെ വിവാഹം നിര്‍ത്തിവയ്ക്കാന്‍ കാരണമാകാറുണ്ട്. എന്നാല്‍ വിവാഹത്തില്‍ നിന്ന് പിന്മാറുന്നതിന് വ്യത്യസ്തമായൊരു കാരണമാണ് ഈ ബിഹാറി വധു പറഞ്ഞത്. ബിഹാറിലെ സരണ്‍ ജില്ലയിലാണ് സംഭവം ഉണ്ടായത്. വരന് ഇടിമിന്നലിനെ ഭയമാണെന്ന കാരണം ചൂണ്ടിക്കാട്ടിയാണ് വധു വിവാഹത്തില്‍ നിന്നും പിന്മാറിയത്. വിവാഹചടങ്ങുകള്‍ പുരോഗമിക്കുന്നതിനിടെ ഇടിമിന്നലടിച്ചു.
അതിന് ശേഷം വരന്റെ പെരുമാറ്റത്തില്‍ വ്യത്യാസം തോന്നിയെന്നാണ് വധു പറയുന്നത്. ഇതാദ്യമായല്ല രസകരമായ കാരണങ്ങള്‍ കൊണ്ട് വിവാഹങ്ങള്‍ മുടങ്ങുന്നത്. എന്നാല്‍ വധു വിവാഹത്തില്‍ നിന്ന് പിന്മാറിയതോടെ വരന്റെ വീട്ടുകാര്‍ ബഹളം വയ്ക്കാന്‍ തുടങ്ങി. ഒടുവില്‍ ഇരുവീട്ടുകാരും ഏറ്റുമുട്ടുകയും വരന്റെയാളുകളെ വധുവിന്റെ വീട്ടുകാര്‍ തല്ലിയോടിക്കുകയും ചെയ്തു. വരന്റെ വീട്ടുകാരെ മര്‍ദ്ദിച്ചതിന്റെ പേരില്‍ വധുവിന്റെ ബന്ധുക്കളായ മൂന്ന് പേരെ പോലീസ് അറസ്റ്റ് ചെയ്തിട്ടുണ്ട്.
