ദുബായ് ; വീണ്ടും തീവ്രവാദ സംഘടനയായ ഐഎസ് ഐഎസിലേക്ക് റിക്രൂട്ട്മെന്റ് നടന്നതായി സൂചന. കാസര്കോട് ജില്ലയില് നിന്ന് രണ്ടു കുടുംബങ്ങളില് നിന്നുള്ള 11 പേരെ കാണാതായി. കാസര്കോട് മെഗ്രാലില് നിന്ന് മൂന്നു കുട്ടികള് അടക്കം ആറു പേരെയാണ് കാണാതായത്. കാസര്കോട് ജില്ലയിലെ വിവിധയിടങ്ങളില് നിന്നും നേരത്തെയും നിരവധി പേര് ഭീകര സംഘടനയായ ഐഎസിലേക്ക് എത്തിയതായി വാര്ത്തകളുണ്ടായിരുന്നു. ഇവരില് പലരും കൊല്ലപ്പെട്ടതായി അന്വേഷണ ഏജന്സികള് സ്ഥിരീകരിക്കുകയും ചെയ്തു.
കേരളത്തില് നിന്ന് വ്യാപകമായി ഐഎസ് റിക്രൂട്ട്മെന്റ് നടന്നുവെന്ന വാര്ത്ത ഞെട്ടലോടെയാണ് ഏവരും അറിഞ്ഞത്. ഇപ്പോഴിതാ ഒരു ഇടവേളയ്ക്ക് ശേഷം 11 പേര് കൂടി കാണാതായി ആശങ്ക കൂട്ടുകയാണ് . ഉപ്പളയില് നിന്നും അഞ്ചു പേരേയും കാണുന്നില്ല. ദുബായിലേക്ക് തിരിച്ച ഇവരെ പിന്നീട് കാണാതാകുകയായിരുന്നുവെന്നാണ് ബന്ധുക്കള് പറയുന്നത്.ഇവര് ദുബായിലെത്തിയിരുന്നതായി ബന്ധുക്കള് വെളിപ്പെടുത്തിയതാണ് ഐഎസിലേക്കു റിക്രൂട്ട്മെന്റിന്റെ ഭാഗമാണോ എന്ന സംശയം ഉയരാന് കാരണം. എന്നാല് ഇവര് ദുബായില് നിന്നും എവിടേക്കാണ് പോയതെന്ന കാര്യത്തില് ഇതുവരെ സ്ഥിരീകരണമില്ല. അന്വേഷണ ഏജന്സികള് ഇക്കാര്യം കണ്ടെത്തുന്നതിനായി തിരച്ചില് ആരംഭിച്ചിട്ടുണ്ടെന്നാണ് റിപ്പോര്ട്ട്.
