കൊച്ചി: മോഷണക്കേസില്‍ കസ്റ്റഡിയിലെടുത്ത രണ്ടംഗസംഘത്തില്‍ ഒരാള്‍ പോലീസ് സ്റ്റേഷനില്‍നിന്നും രക്ഷപ്പെട്ടു. എറണാകുളം സെന്‍ട്രല്‍ പോലീസ് സ്റ്റേഷനില്‍ ഇന്നു രാവിലെയായിരുന്നു സംഭവം. സംഭവവുമായി ബന്ധപ്പെട്ട് പോലീസ് നല്‍കുന്ന വിവരം ഇങ്ങനെ: നഗരത്തിലെ മോഷണവുമായി ബന്ധപ്പെട്ട് രണ്ടുപേരെ ചൊവ്വാഴ്ച കസ്റ്റഡിയില്‍ എടുത്തിരുന്നു. ഇവര്‍ക്ക് വൈകിട്ട് ഭക്ഷണവും വാങ്ങി നല്‍കി. ഇന്നു രാവിലെ ഇവരില്‍ ഒരാളെ പ്രാഥമിക ആവശ്യം നിറവേറ്റുവാന്‍ പുറത്തുകൊണ്ടുപോയി തിരികെ കൊണ്ടുവരും സമയം രണ്ടാമന്‍ പോലീസുകാരന്‍റെ കണ്ണിലേക്ക് കറി ഒഴിക്കുകയും ഇരുവരുംകൂടി രക്ഷപ്പെടാന്‍ ശ്രമിക്കുകയും ചെയ്തു.
എന്നാല്‍ ഇവരില്‍ ഒരാളെ പോലീസുകാര്‍ സംഘം ചേര്‍ന്ന് ബലപ്രയോഗത്തിലൂടെ കീഴടക്കി. രക്ഷപെട്ട പ്രതിക്ക് വേണ്ടി പോലീസ് അന്വേഷണം ഊര്‍ജിതമാക്കിയിട്ടുണ്ട്. രക്ഷപ്പെടുന്നതിനായി ഇരുവരും ചേര്‍ന്ന് നടത്തിയ പദ്ധതിയുടെ ഭാഗമായി ഇന്നലെ വാങ്ങി നല്‍കിയ ഭക്ഷണത്തോടൊപ്പമുണ്ടായിരുന്ന കറി കളയാതെ ഇവര്‍ സൂക്ഷിച്ചിരുന്നതായി പോലീസ് പറഞ്ഞു. നിരവധി മോഷണക്കേസുകളിലെ പ്രതിയായ കംസീറാണ് രക്ഷപ്പെട്ടതെന്നാണ് സൂചന. പോലീസ് പ്രതിയെക്കുറിച്ചുള്ള വിവരങ്ങള്‍ പുറത്തുവിട്ടിട്ടില്ല.
