കൊച്ചി: ശബരിമല വിഷയവുമായി ബന്ധപ്പെട്ടു ബിജെപി സംസ്ഥാന പ്രസിഡന്‍റ് പി.എസ്. ശ്രീധരന്‍ പിള്ള യുവമോര്‍ച്ച യോഗത്തില്‍ നടത്തിയ വിവാദ പ്രസംഗത്തെത്തുടര്‍ന്നു രജിസ്റ്റര്‍ ചെയ്ത കേസ് റദ്ദാക്കുന്നതു സംസ്ഥാനത്തൊട്ടാകെ ക്രമസമാധാനപാലനത്തെ ഗുരുതരമായി ബാധിക്കുമെന്നു സംസ്ഥാന സര്‍ക്കാര്‍ ഹൈക്കോടതിയില്‍ ബോധിപ്പിച്ചു.
നവംബര്‍ നാലിനു കോഴിക്കോടു നടന്ന യോഗത്തില്‍ നിയമലംഘനം നടത്താനും കലാപമുണ്ടാക്കാനും ആഹ്വാനം ചെയ്തെന്നാരോപിച്ചു തനിക്കെതിരേ കസബ പോലീസ് രജിസ്റ്റര്‍ ചെയ്ത കേസ് റദ്ദാക്കാന്‍ പി.എസ്. ശ്രീധരന്‍ പിള്ള നല്‍കിയ ഹര്‍ജിയിലാണു പോലീസ് ഇക്കാര്യം വ്യക്തമാക്കി സത്യവാങ്മൂലം നല്‍കിയത്.
