ഡല്ഹി: സുനന്ദ പുഷ്കറിന്റെ ആത്മഹത്യാ കേസില് ശശി തരൂര് ഇന്ന് കോടതിയില് ഹാജരാകും. ഡല്ഹി പട്യാല ഹൗസ് കോടതിക്ക് മുന്നിലാണ് ശശി തരൂര് ഹാജരാകുക. കേസില് ശശി തരൂരിന് കോടതി മുന്കൂര് ജാമ്യം അനുവദിച്ചിരുന്നു. ഡല്ഹി പാട്യാല ഹൗസ് കോടതിയാണ് ഉപാധികളോടെ മുന്കൂര് ജാമ്യം അനുവദിച്ചത്.
ഒരു ലക്ഷം രൂപയുടെ ബോണ്ടിലും മുന്കൂര് അനുമതിയില്ലാതെ രാജ്യംവിട്ടുപോകരുതെന്ന നിബന്ധനയിലുമാണ് മുന്കൂര് ജാമ്യം അനുവദിച്ചിരിക്കുന്നത്. എന്നാല് ശശി തരൂരിന് ജാമ്യം അനുവദിക്കുന്നതിനെ ഡല്ഹി പോലീസ് ശക്തമായി എതിര്ത്തിരുന്നു. സ്ഥിരമായി വിദേശ രാജ്യങ്ങള് സന്ദര്ശിക്കുന്ന തരൂര് അവിടെ സ്ഥിരതാമസം ആക്കാന് സാധ്യതയുണ്ടെന്നായിരുന്നു ഡല്ഹി പൊലീസിന്റെ പ്രധാന വാദം. ആത്മഹത്യ പ്രേരണ കുറ്റമാണ് തരൂരിന് എതിരെ ചുമത്തിയിരിക്കുന്നത്. 3000 പേജുള്ള കുറ്റപത്രം അംഗീകരിച്ച കോടതി തരൂരിനോട് നേരിട്ട് ഹാജരാകാന് ആവശ്യപ്പെട്ടിരുന്നു.
